8. - 2000 年閱一本便便找到此車，92年前期甲種款，
8座、皮椅、雙天窗、旋轉中座、電子波箱等有齊，車還
算精神，有翻新痕跡，跟車 17 鈴，用一個月後換了更闊
一點日本 17 吋鈴、215/45/17 薄胎，以此車重量計，相當
好飛，個人很喜歡尾輪帶動，覺得較有實在感安全感，
但之後經常載人載貨，又做司機．．．此車令人有
駕著也興奮感覺，外形夠傻吧，日產八個蘋果喎！
由於中置引擎尾轆車，引擎室溫度比較高，保養工夫
也較密，每三千里換基本損耗品，偈油、油隔，波箱油、
尾牙油隔一次就換，風隔喜歡就換，這年頭每日粉嶺九龍
穿梭，有時小小飛車，$1.4 - 1.7/km，
2000年油價約十元一升，我覺得好滿意，半年後做汽車
維修的妹夫也買了一部，但中期型 94'，只看到份頭料有
不同，絲絨座椅，其餘沒甚分別，一起出街就好像兄弟車
幾好玩．．．．
2003 年尾副 SR-20DE 機器，開始來料，最後一個盤(近車尾)
入水，上城門長命斜最見功，未上到尾會自動熄火，被水浸
熄吧？左整右整抬機器等等，發現開始大食，不對路了，
係時候講拜拜，用開大車，突然間好懷念部大發 Cuore，
周圍找找看，最後落實出部新車．．．又玩660？
9. - 2004 年新車，Daihatsu Gino L-700 Turbo intercooler，
手波，車行回收我部 C23 五千元，此時大發已歸豐田旗下，
就當買了部Toyota，銀色要訂的，估計現仍在街的銀色
不出三部，起燈位一流，日本 Kcar 法例 140 錶，
一陣就爆錶了，絕對有 turbo 車感覺，自己又
沒心裝個 speed meter，如裝後加小改，舊六隨時沒問題，
可能此車復古款，有高收視情況，多次泊街被拍照，
似迷你仔吧，唔知點解，無論泊街吃飯、洗車，部車
經常性被圍觀，唯一剛剛開始做音響生意，大喇叭
裝不下，0.9 - 1.1/km 幾慳油的，直至 06 頭開始感覺
部車的確好好，但實在太細，於是首次在 28car 試放，
有人買便賣，沒有就繼續用吧。
講起 28car 哥哥仔試車，有段驚心動魄場面，經 Email
與準買家約好，晚上九時荃灣廣場會面，夜晚看車要開電筒，
點看得真？準時到達，對方兩部勁野剎到，掃把佬 Legacy
Wagon、新款 Cooper 大S，共 6 位型人過來，原來準買家
是個 26 兼昨天才正式取牌的後生仔．．．．
我第一句問：朋友仔你驚唔驚呀？正式出過街未？
佢點答我呢：話考牌時渣過囉！？
佢其中一位幾懂車的 (Cooper 車主)，全車周圍睇睇睇，
二十分鐘後，我話你有心要都試試啦，好唔好？哥仔說好的。
Ok，佢渣車啦，我坐隔離(預左隨時拉手制救命)，Cooper
朋友坐後面，三人試車，好開得．．．．嗯？成兩分鐘都
開不到車，哥哥仔話 d 手腳搞唔掂．．．我正想說不如算
吧啦，後面 Cooper朋友話不如由我試比佢睇啦，Ok，又
得o者，上荃灣路衝一段試齊五粒，轉落已沒車行工業區，
問佢咁而家試唔試呢？你得唔得架，佢又話想試下，開車
三次死火，終於叫做行到，咁帶佢行下高速啦，又上荃灣路
直落有線回旋處，諗住一個圈返回原地收工，佢完全冇意識
4 波衝斜路落回旋處，我仲要幫手睇位，慘過教仔！我話仲
唔拖低一粒，嗱 ~前面回旋處入第三個口，佢就狂比油向前衝
直指屯門，唉．．我仲要幫手撥軑，冇得救直上啦直上啦，
上了屯門公路！我話細佬定 d 來，唔緊要照行，我地深井
至回頭啦。
去到深井，我話停一停先，我要抽返飛煙定定神，差 d 比你
嚇Q死呀細佬！「當時我心想，細佬你已列入不適宜駕駛行列」
跟著 Cooper 朋友自告奮勇回程佢試，又得o者．．
呢位人兄總算懂車，開得到上屯公，時 100 時 90，我任你試
去到汀九落斜段，突然靈光閃閃兩下，唉！死未丫．．．．
佢話嗯？咩事呀？我第一時間睇睇佢個錶，95、97到啦，
我即時話麻煩你陣間比 d 個人資料我，阿 Sir 放飛箭唔該
你自己認頭，你剛剛比白鴿籠影張靚相呀！
回到原位，取得車手資料，佢都自動自覺，冇甚特別，
咁問細佬你點？岩唔岩？佢同女朋友都相當喜歡部車，
講價．．我平了一點，佢話考慮三日，Ok．．走人。
終於一星期後，呢位年青人真的來電要買，左籌右借
砌夠畢錢，翌日一同往運署轉名搞掂，咁橋告票也寄來了，
一次過搞清所有手續，Cooper 朋友被影 88km，自己認頭，
填駕駛者資料，我就冇事o勒，總括來說部車將來
應該會幾痛苦．．．．
以後再放車的話，唔好搞世伯啦，比車行賺好了！
注：Gino 也值紀念，小弟自身成家立室之用，
而且一滴「貴油」未沾過，貴者．．明啦。
沒有留言:
發佈留言